Plataforma Nasional Bee Saneamentu No ijiene Timor-Leste ( PN-BESI TL ) hanesan rede ida atu garante servisu advokasia ne’ebé forte iha seitór bee no Saneamentu, razaun husi estabelesimentu rede PN-BESI-TL nudár prossesu ida atu garante mós partisipasaun organizasaun sosiedade sivíl iha seitór relevante hodi tau matan ba prosesu polítika no dezenvolvimentu setór bee, saneamentu no Ijiene iha Timor - Leste no garante katak to’o iha 2030 povu hotu bele asesu ba bee ne’ebé seguru, hadi’a saneamentu no ijiene iha komunidade.

Atu asegura servisu advokasia ne’ebé forsa iha setór Bee, Saneamentu no Ijiene maka Organizasaun Naun Governamental lokál hamutuk 20 mak hanesan : Assosiasaun HAK, Fundasaun hafoun Timor-Loro Sa’e, ETADEP, HIM, Timor Vision, PERMATIL, Bee Matan Wailia, AMAR, BIAHULA, Loro Leon, NTF, HealthNet, Maledon Soha Fitun, Feto Enginhera, Fundasaun Aplimentec, Grupo Feto Foin SA’e Timor-Loro Sa’e, RHTO, Fundasaun Luta Ba Futuru, Fundasaun Knua Haberan Komunidade, hamutuk hodi estabelese rede servisu ida ne’e ho naran “ Plataforma Nasional Bee, Saneamentu no ijiene Timor-Leste” ne’ebé mak hari’i iha loron 19 Marsu 2014.

Hare husi baze legal PN-BESI-TL hari’i haktuir ba konstituisaun RDTL artigu 43 aliñea 1, 2 no 3 ne’ebé koalia kona ba liberdade hari’i ka forma Assosiasaun no garante mós legalidade Institutional tuir Dekretu Lei Númeru 5/2005 kona ba organizasaun Naun Lukrativu iha Timor - Leste.

Objetivu :

PN-BESITL sai rede ne’ebé forte hodi konsolida no promove partisipasaun sosiedade sivíl hodi influensia Instituisaun Estadu atu asegura povu asesu ba bee, saneamentu no ijiene.

Misaun :

Halo peskiza no análize kritíku hodi promove transparénsia no akuntabilidade husi Instituisaun públiku, sosiedade sivíl no setór privadu iha seitór Bee, saneamentu no ijiene. 

Promove partisipasaun povu iha prosesu dezenvolvimentu no sai na’in ba Dezenvolvimentu Bee, Saneamentu no Ijiene iha territóriu Timor tomak. 

Vizaun :

Povu Timor - Leste asesu ba Bee ne’ebé seguru, saneamentu no ijiene.